वाते मुंगा मोलारी
my swan song
गोर धाटी माईर ‘सुंग’ इ लोककला संप्रेषण,दळणवळण,संदेशवहनेर एक उत्कृष्ट नमूना ..!
“गोरमाटी बोलीभाषिक बनजारा धाटीमं ‘सुंग’ये लोककलान् घणो मोल रच्. होळी,वाया नातरा माईर सुंगेर रसाळीर चवेर वर्णन करेन भी ताकतेर शब्द कमी पडच्.”सुंग”ई लोककला भाषिक संप्रेषण,वैचारिक दळणवळण,संदेश वहनेर उत्कृष्ट उदाहरण छ.आज इ लोककला मण्णेरो कडापो भोगरी छ.ओरो अस्तित्व धोकेम आवगो छ.इ घण दकेर वात छ..!
मार तांडेम् “बंगडी बिल्लोर” इ सुंग तो घणो बोधप्रद रं बंगडी बिल्लोर ये सुंगेरो नायक स्व.दुधराम पालतिया आज आपणेम छेनी.होळीम इ नायक सेन् हारदावच्.मुके मनक्यार अभिनय तो आज भी हामार तांडेवाळे नानेमोटेर हिवडामं वराजरो छ.सुंगे माईर दुधराम पालतियारो अभिनय इ अभिजात कलारो उत्कृष्ट उदाहरण रं..!
“बांगडी बिल्लोर” ये सुंगेरो नायक मुको रच्.एक माळकरी माटी घरं मुक्या बांयी रच्.एकदन माळकरी धाम जायेर ठरावच्. धाम जायेसारू निकळच् जना ऊ मुक्यान कन् बलान कच् क, मुक्या,म धामेन जारो छू.होटो फरेन् मीनाखांड लागीये. घर जतन कर, घरेसामू देक! मुक्या मुंडी हालान हुंकारा भर दच्.
ओरो मालक धामेन चले जावच्.मुक्यार जबाबदारी बड जावच्.एकदन बंगडी वेचेवाळो “बांगडी बिल्लोर” हानू आल्डातो तांडेम् फरु करच्.जना ओर मालकेर गोंण्णी ओ बंगडी पेरेसारू ओ बांगडी बिल्लोरवाळेनं हाकमारच्.
ओर कन्ती बंगडी पेरावच्.बंगडी पेरातूवणा ऊ बांगडी बिल्लोरेवाळो ओर मालकणेर हात चचोळू करच्.हात चचोळतो चचोळतो बांगडी बिल्लोरेवाळो ओर हात थेट ओर मालकणेर काकेताणू लेजावच्.इ से चारसना मुक्या ओर आकीती देकु करच्.
देवधामेर नामेहेट् मनक्यार गैर हाजरीम् घरेम् कांयी कांयी चारसना वच्.येरो उत्कृष्ट सादरीकरण मुक्यार अभिनये माईती वच्.ये सुंग – लोककला माईती एक अर्थ सुचक भाषेत्तर संदेश वहन,संप्रेषण वच्.
मालक देवधामेती होटो आयेर बाद् घडी हुयी से हकीकत मुक्या मुकेर हावभावे माईती ओर मालकेन कच्.ये सुंग कतो लोककला माई मुक्यार भूमिका वटायेवाळो अभिजात कलारो नायक स्व.दुधराम रुपला पालतिया आबेर होळीम केनी दकायो कोनी.ई दक हामनेन सलरो छ.हर होळीम इ दक सलतो रिये.
तांडेर ये सुंगे माईती तांडेर जडणघडण वेतीती.
ये महान कलावंतेरे पावन स्मृतीनं नवण..नवण..!!
भीमणीपुत्र
मोहन गणुजी नायक
गोर कैलास डी राठोड ठाणे
9326791504
