व्यवस्था लूटी हामेन, लूटो वोनं चलायेवाळो,
आपणो हक्क मळायेवास व्यवस्थाम हात घालो.
करन कूछू तांडेसामू चालो….!
शिक्षणेती वंचित गोर भायी,
तांडा उधारेवास प्रचार करलो,
लदेणी, साटा काटेन चलेगे,तांडो रेगो ठालो.
करन कूछू तांडेसामू चालो….!
पाणीपाऊस पढरो कोनी,
खेती पीकरी पण हमीभाव कोनी मळरो,
कर्जेम डूबगे शेतकरी करन दुनिया छोड चालो.
करन कूछू तांडेसामू चालो….!
रोजगार छेनी, नौकरी मळेनी, आरक्षण हेगो आपणो ठालो.
तांडो भंदीय शिक्षणेती, तांडेरो पाया मजबूत करलो.
करन कूछू तांडेसामू चालो….!
ढोर वेतो संपत्ती, शिक्षण हामारो उद्धारेवास करलो,
माडी हावेलीन तार कोयी पूछेनी, तम मीटो बोल बोलो.
करन कूछू तांडेसामू चालो….!
जात लागेनी मनं, लागेनी पात,
वोती वेरो छ समाजेम घातपात.
येकज माळेर मनी छ सारी येनूनं आबं वळखलो..
करन कूछू तांडेसामू चालो….!
व्यवस्थाम थान मळायेवास धर्मेन मत कूटो ठालो पालो,
संविधान समजन लो, जगे सोबत जायेर सीकलो.
करन कूछू तांडेसामू चालो….!
गोरुनं जगाढेनं, नवी तूकारी देयेनं
गोरुरे यितीहासेम आयी संकल्पना, तांडेसामू चालो.
भियावो..!
गरज आब टांडेर विकास करेर
संविधानेती शिक्षित करेर
करन कूछू तांडेसामू चालो….!
भास्कर राठोड (भासू)
ठाणे /मुंबई
८१०८०२४३३२
प्रमुख प्रतिनिधी: रविराज एस. पवार
ऑनलाइन बंजारा news पोर्टल
8976305533
