बापू लढरो सोतारे जातेती!
जलमो गोर कुळेमं,
याडी भीमणी गणूरे घरं!
गोरधाटीर पांग फेडेरो,
वचार आयो मातेम वोरं!
लको विज्ञानवादी वचार, भाविष्यवेधी मातेती!
बापू लढरो सोतारे, अज्ञानी अशिक्षित जातेती!!
कोयी ढेडिया के बापुन,
कोयी वेंडो मोवन्या केनाके!
बालिदानेर कदर किदे कोनी,
जात छोडेर आज्ञा देणाके!
पचा लिदो से अपमान, सगळतीरे हिमतेती!
बापू लढरो सोतारे, अज्ञानी अशिक्षित जातेती!!
नाळीनाळी जातेधर्मेंर,
वणाणवणान भेटेन लोक आवं!
पुस्तक वाचेनी जे समाजेम,
का जलम लिदो केजावं?
जलमलेतो जर कोरूम, वटालेते मातेप हुसेती!
बापू लढरो सोतारे, अज्ञानी अशिक्षित जातेती!!
जपो जको धुंडन काढो,
साहित्य निर्मितीर जिद्द किदो!
पुरो आयुष्य खरचताणी,
गोरुरो तत्वज्ञान सिद्द किदो!
बापू समजारो गोरून, मुंगा मोलार वातेती!
बापू लढरो सोतारे, अज्ञानी अशिक्षित जातेती!!
©️✍अमोल नायक
भीमणीपुत्र कटमाळो
सौजन्य- गोर कैलास डी राठोड ठाणे.
