*हिम्मत मत हारो*
एक दाड एक किसानेरो गधा एक वावडीम पडगो|
ऊ गधा गंठातुणी जोर जोरेती रोरोतो,
अन्न किसान संबळरोतो अन्न विचार कररोतो की ऐन कायी करणु, अन्न कयी कोनी.
अंतेम उ निर्णयलीदो कि मारो गधा घणो मोटो वेगोच, अतः वोन बचायेती कायी फायेदो वेवाळो छेनी.
अन्न येरवेस वोन वावडीमज मट्ठी करनाकेर सोचलीदो.
किसान जको तांडे वाळेन मदत करेन बलालीदो.
से भाई एक-एक फावडा लेताणी वावडीम धुड खीचेलाग.
जना गधान समजेम आई कि ये से काई वेरोच, उ आजी जोर जोरेती अलडा-अलडान रोयेलागो.
अन्न उ आचानक शांत वेगो.
से भाई उनुर वो ध्यानेम वावडीम धुड खीचेलाग.
थोडा टैमेर नंतर किसान वावडीम वोगडन देकच तो घबरागो.
वोर जिवे(डिल)पर पडरी जकोन हर एक फावडार धुडेन गधा हुशार वेताणी वो धुडेन जिव हलाताणी हेट पडकाताणीन वो धुडेन खुन्द खुन्दन सिडी बणारोतो अन्न वो सीडी पर चडन दुसर सीडी बणारोतो.
हनु करतो करतो उ गधा वावडिर कीनारेपर आवगोतो अन्न उडी मारताणी वावडीर भार कुदगो.
असो अपण जिवनेम भी घणे तरीकारी धुड फेकेजावच,
घणे तरीकारी गंदगी अपण पर पडच.
वसो अपणेन आंग बडेती होटो खीचेसारू घणे लोग तयार छ.
कुणसी कारण अपणेन भला बुरा कछ.
ऐसे वाते ध्यानेम न घाललेन वावडीमज न पडेरेनु,
जिन्दगी म जिवेन हला-हला ताणी हर एक प्रकारेर गंदगीन हेट पडकादेर छ.
अन्न भियावो ऐ लेखेन समजलेन जिन्दगी म सीडी बणान, अपणी प्रतऐक खोजे समाजेर भलाई सारू आंग पाडते जायेर छ.
जय सेवालाल🙏
भियावो मार ऐ लेखेम चुक-भुल वेगी वतो मन तमारो नानकीया भाई समज ताणी छमा करदीजो..👏
धन्यावाद…….
गोर. रविराज एस.पवार
शामपुरहळ्ळी तांडा, वाडी, कर्नाटक.
जि.बी.एस.एस. भारत (स्वयंसेवक)
भा.बं.भ.से.स.( कलर्बगी विभाग खजांची)
08976305533
