हूंढो
(करो बेटीरो सन्मान)
बेटी जलमी,
फेरो मत मूंढो,
शिक्षण सीकावो,
दो मत हूंढो..!
*बेटी देशेर बढावं मान.*
*करो बेटी रो सन्मान..!*
बेटानं आपण
कतरायी सीकाया,
सेवट रछ
बेटीरज मया..!
*बेटी गेणेर छ खानदान.*
*करो बेटी रो सन्मान…!*
बेटी आन बेटामं
फरक मत करो,
बेटीर जीवणेपं
फेरो मत छरो..!
*बेटानज का मानपान.*
*करो बेटी रो सन्मान…!*
बेटानं काम को,
तो कानेमं मारं छ,
वूज आपण बेटी
आंग वेण मानं छ..!
*काळे मनेरो यी आवधान.*
*करो बेटी रो सन्मान…!*
बेटी रो प्रमाण
कम वेतो जारो,
बेटान हाम केरे
वंशजेरो दिवो हामारो..!
*छोरीन बोजा मत मान.*
*करो बेटी रो सन्मान…!*
राब राब राबरो
हूंढेवास पीसा जमारो,
हूंढो लेन आंघेवाळो
अत्याचार कररो..!
*वीचारेन मत मेल गाण.*
*करो बेटी रो सन्मान…!*
बेटीती हामारी
वेलवाडी बडरी,
बेटी सीकरी
पीढीनपीढी घडरी..!
*हूंढो लेयेवाळेती रो सावधान.*
*करो बेटी रो सन्मान…!*
बेटार वेगो वीया,
खटलेन लेन धासो,
खेतारीरे वाटणीमं
बेटीर भी हीसो..!
*बेटी बेटार हाक छ समान.*
*करो बेटी रो सन्मान…!*
बेटी छ तो याडीरो
थान वछ पको,
हूंढेवास तम केरी
हेटं मत झूको..!
*वंश बडायोरो मळं सन्मान.*
*करो बेटी रो सन्मान…!*
बेटीमं आन झाडेम
फरक कायीं छेनी,
खूडनाके येकवणा,
तो फरन वू वूगेनी…!
*आब तो मातेन दो चलान.*
*करो बेटी रो सन्मान…!*
©
भास्कर राठोड (भासू)
ठाणे /मुंबई
*८१०८०२४३३२*
