”वाते मुंगा मोलारी”
:-भीमणीपुत्र
‘अश्मयुगीन संस्कृतीर ओळख ‘ सुकल्डी (Bacon)’-
संस्कृतीर सेती पेल अवस्था कतो अश्मयुगेर संस्कृती छ.अश्मयुगीन संस्कृतीरे सुरूवातेरे अवस्थाती मानवेर वस्तूरुप संस्कृतीर निर्मिती हुयी. ये कालख॔डेमं मानव माचळी मारेरो नतो पचं येड रमती माइती मळं जे मांसबंदेपं आपण उपजीविका करतोतो. मानवी संस्कृतीर दी कालखंड मानवशासत्रेर अभ्यासक निश्चित करमेले छ. पेले कालखंडेमं मानव भाटारेवस्तूरो अन हत्यारेरो वापर किदो. दुसरे कालखंडेमं धातूरेवस्तूरो वा हत्यारेरो वापर किदो.संस्कृतीरे पेले कालखंडेनं अश्मयुग नतो पचं पाशाणयुग तो दुसरे कालखंडेनं धातूयुग संबोधेमं आयो छ.एकंदरीत अश्मयुगेर काळ ख्रि.पु.100 000 ते ख्रि.पु.4000 वर्षेर मानमेले छ.
अश्मयुगेर कालखंडेमं आदिम मानव येड रमेसारु भाटारे हत्यारेरो वापर किदो. भाटाती येड रमन उपजीविका करणू इ खूब जिकरीरो अन ओबी कठीण काम र.आजी सवारं येड साजीये क, न साजीये येर बी भरोसो कोनी रेतोतो.अन्नेरो पुरवठा अपुरो अन बेभरोसेरो रेतोतो.आसे काळेमं येड रमती माइती मळो हुवो उत्पादित मांसबंदेनं आदिम मानव सुकान रकाडतोतो अन आसे सुकाये हुये मांसबंदेर साठा करन रकाडतोतो.
ये संस्कृतीरो अवशेष आज बी गोरमाटीरे संस्कृतीमं लाबचं. येड रमती माइती आपणे हिस्सेपं आयेहुये उत्पादित मांसबंदेर बारीक बारीक टकडा करन ओनं सुत्तळीम परोताणी गोरमाटी सुकावचं. आसे सुके मांसबंदेर टकडानं गोरमाटी “सुकल्डी” Bacon कचं.
आस इ सुकल्डी वेळा वकतेपं गोरमाटी सिजाडन खावतोतो. अश्मयुगीन संस्कृतीरो इ अवशेष गोरमाटी आजेताणू जतन करन रकाडमेलो छ. गोरमाटी संस्कृती माइर इ परंपरागत जोपासो हुवो इ सुकल्डीर साठा करन रकाडेर इ प्रथा जुने पाषाण युगे माइर आदिम मानवेर अर्थ व्यवस्थारो निदर्शक छं गोर गणे माइर सुकल्डीर खाद्दान्न इ प्रथा अश्मयुगीन संस्कृतीरो अवशेष छ.
गोरगण; गोरमाटी इ भारतीय आदिम जन जीवने माइरो आदिम संस्कृती जोपासेवाळो एक स्वतंत्र आदिम गण छ.इ म मार लकणी माइती कयिकवणा सिद्ध करमेलो छू. …कोयी मानो च्या मत मानो; पणन मार केयेर तात्पर्य आतराज छ क, गोरमाटी संस्कृतीरो उगम थेट ख्रि.पु.एक लक्ष वर्षेर आंगड्यार अश्मयुगीन संस्कृतीनं जान भीडचं इ सुकल्डी ये खाद्यान्ने परती निर्विवाद स्पष्ट वचं.
गोर गणे माइर ” सुकल्डी” इ खाद्दयान्न गोरमाटीर अश्मयुगीन जीवनेर ओळख पटान देयेवाळो एक अदभुत अवशेष तांडो आज बी जतन करन रकाडमेलो छ…तांडेनं मारो ‘नवण’ छ..!
भीमणीपुत्र
मोहन गणुजी नायिक
______________________
सौजन्य:गोर कैलास डी.राठोड
गोर बंजारा आँनलाईन न्यूज पोर्टल मुंबई महाराष्ट्र राज्य,
मो.9819873477
Tag: Banjara Live News, National news, Lamani, Lambadi, jai sevalal
