प्रतिनीधी…रविराज पवार
गोरुर दिशा अन् दशा
================
आपणो गोर समाज पेना लदेनी करतेते केव जना बाईबापडी हेन दागदागिना नाणो गेणेम लदबद रेतीती केव ,तो भी आपणो समाज कदिज केनी फसायो कोणी क कने लुबाडो कोणी .पण आपणे मेहनतेसी खुब धन कमाताणी दया दान करतो तो एक एक तांडरीर डिलेप 5/5 किलेर चांदी सोनेर गेणो गाठो रेतो तो पच आब गोरुर इ ठठियारो कत गेव .कुण लुट खागो .कुण सी धाड लुट खादी गोरुन .जे तांडेर मायी रंचना रेतीती जे कत गी .
दन निकळतो तो नंगरीम नंगारा घोरतेते .वादना वाजतेते .डपडा घोरतो तो अन् मार तांडेर नायकेन मान मरातब घणो मनो मलतो तो .पैयी पामणा आतेते ओनुर घरोघर मनवार हेतो तो .
पच कत चलेगे हामार ये दन ? कत गमागी हामार निद चेन ? आसो कायी घडगो जेम हामार सारी वेरागो .अन् फकत हामनेन यादेर झरोका झुलेन रेगो .
जे दानी समाज हेतो उ आज तांडेपेडे मायीर गरीब समाजेर भावनिक, आर्थिक,लुट करे लागो .इ आसी हामारी दशा हेगी .चालो सारी हेन मलन समाज घडावा समाजेन लुटेसी बचावा .चालो कंबर कसा अन् समाजेन कसाई सी बचावा जनाज आपणो गोर समाज गोर करन उंच नाक करन चालीय .
आज विज्ञान युगेम मार गोर समाज अंधश्रध्दाम डुबरो
छ .वोन बार काडेर जिम्मेदारी हाम सारी शिकेपडे गोरपुतेर छ .
जिजा राठोड
जळगांव
खान्देश
