*** मंगाळेर माकी ***
देको मंगाळेर माकी
कतरी छ वोंदूम येकी
आपणेम काहा यी बेकी
छोड दा आबं फेकाफेकी …
गरज छ ये वेळेर
मनक्या मनक्याती जोडो
हातेम हात लेताणी
पगेती पग आंग बडो …
नजर पडी जना मार
मंगाळेप बेटी माकीपं
पेलीवणा देकन तो
वीसवास कोनी वीदो आकीपं …
बगीचा मायीर फूलेपरती
पराग रस गोळा करचं
जेर परीती वचं वोतरा
मंगाळेम लान भेळचं …
छेयी वोत रीस केनी
छेयी केरीमायी लडायी
ध्येय फक्त बणावा मंगाळो
करेनी कोयी ठालपाल बडायी …
हाम लोकूम का पचं
येर वलटो चालचं
कीडी,माकी सदरगी पण
मनक्यान कना कळचं …
सुशिक्षित,बुद्धिमान लोक
ढेर आपणेम घणे छं
जेर जको दकान वगाडन
पालकती मारन बेटेचं …
येकजाग कनायी भळेनी
न मळाव न कती मोर्चा
ठाली कुटं,थोती वराडं
गली गलीम नुसतं चर्चा …
ढूसपणो आपणो बाजू मेलन
गोरूसारू येक वेजावा
येकमेकेन साथ देताणी
धोळो झेंडा फडकावा …
# लखनकुमार मा.जाधव #
-गोर कैलास डी राठोड
गोर बंजारा आॅनलाईन न्यूज़ पोर्टल मुंबई
