*।। *गोर स्वयंसेवक संघेर सिद्धांत* ।।
=======================
गोर स्वयंसेवक संघ आपणे सेवामा जल्दी आवरोच . ई संघ एक ठोस सिद्धांतेपर चालेवाळो छ .
हानु केयेमा आवच की , *अनुभव घणो मोठो गुरू छ* . अनुभवेमांईती प्रत्येक मनक्या जीवणेमा नवी वाते शिकतो जावच . शिकतो – शिकतो आपणेमा बदल घडावतो जावच . ये अनुभवेर आधारेपरच *गोर स्वयंसेवक संघ* जलमेन आवरोच .
आपण सारीरो *अनुभव* ई छ की , लोक आपण – आपण काम धंदा तो करच , पण समाजेमा असे कांई लोक छ , ओ आपण 90% पेक्षा जास्त ऊर्जा ,शक्ती, चेतना , वेळ आपसेमा भांडेसारु , एकदूसरेर टांगे खिचेसारू, भलो बुरो केयेसारू , एकदुसरेन गाळी देयेसारू , दुसरेन कमी लेखेमा, होटो खेचेमा, म कतरा मोठो दुसरे कसे हलके ई साबित करेसारू घालरेच . असे प्रवृतीर लोक आपणे समाजेमा जास्त छ, करन आज समाजेर जादा शक्ति आपपसेमा लडेमा वाया जारीच . ई बिमारी समाजेसारू कतरी खतरनाक छ , येरो विचार करेसारु कोई तयार छेनी , केरी कन वेळ बी छेनी .
हाम थोडासो वेळ काढन , ये वातेपर थोडासो चिंतन किदेचा . ओ चिंतनेपर चिंतन करन *गोर स्वयंसेवक संघेरो* संकल्प लिदेचा
———————————————
*गोर स्वयंसेवक संघेर सिद्धांत*
(१) आपणी सारी शक्तिरो, योग्यतारो उपयोग समाजेमा सकारत्मक विचार पेरे सारू करणु .
आपणी ऊर्जा, शक्ती , वेळ समाजेरे भलेसारु, कल्याणेसारू, उत्थानेसारूच खर्च करणु .
(२) कोई समाज , व्यक्ति ,जात, धर्मेविषयी व्देष, इर्षा , तिरस्कार, वैरभावना मनेमा रकाडन काम न करणु .आपणो वेळ, शक्ति, योग्यता समाजेमा सकारात्मक विचार पेरे सारूच लगाणु .
कोई समाज, व्यक्ति, जात, धर्मेर बाबतीमा नकारात्मक विचार लकेमा , समाजेमा पेरेमा , टीका- टिप्पणी करेमा आपण योग्यता , शक्ती , वेळ खर्च न करणु .
(३) बेकार वातेपर आपणो वेळ खराब न करणु. ओमा माथो न घालणु .
(४) सभा , संमेलनेमा दुसरेर विचार शांततेती सांभळेर आदत लगाडणु . विरोध करेर भूमिका छोडणो . तात्काळ प्रतिक्रिया न देणो, रिएक्ट न वेणो. संस्कार, शिष्टाचारेरो महत्व जाणणो . शांतमातेती विचार करन आपण विचार मांडणु.
(५) इतिहास ढुंढेमा वेळ न घालणु. इतिहास निर्माण करेसारू प्रयत्न करणु .
(६) जगेसोबत चालेर आदत लगाणु .
(७) समाजेमांई गटबाजी न करणु . समाजे मांईरी गटबाजीन प्रोत्साहन न देणो .
(८) सोता आपणे जीवणेेमा नियम, संयम , सदाचार लायेर प्रयत्न करणु . निराभिमानी, नि:स्वार्थ भावनाती काम करेर सवय लगाणु . सोतान मोठो करेसारु धडपड न करणु .
(९) समाजेसामुती मान सन्मानेर अपेक्षा न करणु . लालचेती दूर रेणो.
१०) समाजे भारेर किंवा समाजे मांईर जे लोकुती आपणो पटेनी उनुर सोबत वादविवाद करेमा आपणो किमती वेळ , शक्ती बरबाद न करणु . वती दूर वेजाणो .
११) समाजे भारेर किंवा समाजे मांईर जे लोक *गोर स्वयंसेवक संघेरे* विचारेन , कामेन विरोध करे ओ लोकुन आपण मार्गदर्शक , प्रेरणा स्रोत , शक्ती मानणु . उनुती वाद घालेमा आपण वेळ, शक्ती खर्च न करणु . उनुर बाबतीमा व्हाट्सएप्प, फेसबुक किंवा इतर कुणसेही सोशियल मेडियापर विवादास्पद, अपमानजनक लिखाण न करणु . आपणो कती चुकरो विये तो ओ चुके सुधारणो . चुक दकाळेवाळेऊन धन्यवाद देणो .
=========================
* *गोर स्वयंसेवक संघेर* * उपरेर विचार जेन पटच ओ हमारे सोबत जरूर आवणु आणि आचे काम करेर सोगन लेणो .
=========================
संपर्क करेसारू :
Whatsapp No 9595765235
=========================
गजानन डी. राठोड
प्रमुख प्रतिनिधि – बंजारा न्यूज ऑनलाइन पोर्टल
