जात पंचायत अन टांढो पंचायत येम केवळ नामेर फरक छ क दोयी वेगवेगळी छ?

जात पंचायत अन टांढो पंचायत येम केवळ नामेर फरक छ क दोयी वेगवेगळी छ?
१ ) जात पंचायतेर पद मालम छेयीं.
१ ) टांढो पंछायतेर पाच पद आन चवदं पदाधीकारी छ.

२ ) जात पंचायतेम नारीन थान ( स्थान ) छ क छेयीं ? मालम छेयीं.
२ ) टांढो पंछायतेम नारीन थान छ आन चवदं पदाधीकारीम सात पदाधीकारी नारी छ.

३ ) जात पंचायतेप देक रेक करेवाळ वूपरेर पंचायत छ क छेयीं ? मालम छेयीं.
३ ) टांढो पंछायतेप देक रेक करेवाळ वूपरेर पंछायत छ. जेरो नाम ‘ नंघरी पंछायत ‘ छ.

४ ) जात पंचायतेन नेती ( नीती ) देवाळे सेवारो संघ छ क छेयीं ? मालम छेयीं.
४ ) टांढो पंछायत आन नंघरी पंछायतेन नेती देवाळे सेवारो संघ छ. जेरो नाम ‘ सत संघ ‘ छ.

५ ) जात पंचायतेसारू नेम ( नीयम ) रोळेवाळे जेतारो संघ छ क छेयीं ? मालम छेयीं.
५ ) टांढो पंछायत आन नंघरी पंछायतेसारू नेम रोळेवाळे जेतारो संघ छ. जेरो नाम ‘ आसा संघ ‘ छ.

६ ) गुन्हेगारेन जात पंचायत जातेर भारं काडं छ करन सामळो छू.
६ ) गणेगारेन ( गणेन गार करेवाळेन ) टांढो पंछायत टांढेर भाऱ काडेनी,
दांढ छ.

७ ) जात पंचायतेम जटील वातेरो न्याय नीवाडो कूं करं छ, मालम छेयीं.
७ ) टांढो पंछायतेम आवगड वातेरो नसाब लींबेरो डोळा तोडान करं छ.

८ ) जात पंचायतेम सेती मोट सजा कूणस छ, मालम छेयीं.
८ ) टांढो पंछायतेम सेती मोट सजा खसी करेर छ.

९ ) जात पंचायतेर पदाधीकारीर नीवड कूं करं जको मालम छेयीं.
९ ) टांढो पंछायतेम डायेसाणेर नीवड टांढेर आसामी करं छ, नायेकेर नीवड डायेसाणे करं छ आन कारभारी, नसाबी, हासाबीर नेमनूक नायेक करं छ.

१० ) जात पंचायतेम मतेरो आधेकार केनं केनं छ जको मालम छेयीं.
१० ) टांढो पंछायतेम मतेरो आधेकार फकसी माणसेन छ. छीचार, मनकीया आन डोकडोकरान छेयीं.

११ ) जात पंचायतेर पदाधीकारी कायीं काम करं छ आन कूं काम करं जको मालम छेयीं.
११ ) टांढो पंछायतेर पदाधीकारी कतो  कारभारेन, नसाबेन हासाबेन नायेक नायेकणेर साक ( साक्षी ) रछं पण केरी साक पूरायेनी. कारभारी कारभारण टांढेरो कारभार करं छ. नसाबी नसाबण टांढेर आसामीर नसाब तोडं छ. हासाबी हासाबण टांढेरो हासाब रकाडं छ. येक डावोसाणो डावसाण येक साल टांढो पंछायतेम नेती नेमेर वूपदेस देते रछं. येक डावोसाणो डावसाण येक साल नंघरी पंछायतेम नेती नेमेर वूपदेस देते रछं. येक डावोसाणो डावसाण येक साल टांढेम पूजापाती करते रछं. तीनी जागं येक येक साल डावोसाणो डावसाण फरते रछं.

१२ ) जात पंचायतेर पदाधीकारी वीयावाळ रछं क कोनी, मालम छेयीं.
१२ ) टांढो पंछायतेर पदाधीकारी वीया करे करायज रछं. कू़ंवारेन आन बना जोडावाडेरेन पदेप रकाडेनी.

१३ ) जात पंचायतेर मूखीया लोकूर नातेम रछं क कोनी, मालम छेयीं.
१३ ) टांढो पंछायत आन नंघरी पंछायतेर मूखीया आपापणे टांढेर आन नंघरीर लोकूर नातेम रछं.

१४ ) जात पंचायतेम नारीर नीवड कूं करं जको मालम छेयीं.
१४ ) टांढो पंछायतेम पदाधीकारीर टांढरी करन आपो आप कतो पदसिथ्द पदाधीकारी करन नारीर नीवड वे जावं छ.

आसे वजी कायीं फरक केतू आये.
===
– मारतीया रामचंधीया भूकीया

प्रमूख प्रतिनीधी.
रविराज एस. पवार
8976305533

Tag: Banjara Gormati Tanda Panchayat System in India