जय गोर जय मेरामा
“दातळी महिला साहित्य संमेलन”
बंजारा तमाम महिला वर्गेसामुसी जलदीम जलदी *पेलो दातळी साहित्य संमेलन* जलदीज लेयेम आयेवाळो छ . सब स्री जात एक गोर पिठेपर आथाणिन समाजेम स्री सनमान करो अन हाम महिला सामु भी एक सजिव व्यक्ति करन समानतासी , सनमानेसी देखो यी आव्हान करेवाळो छ …
*दातळी नाम रकाडेर कारण*
आदिम काळेमायी पेट भरेसारु मानव समुह भटकंती करतो एक जागेसी दुसरी जाग लादतो लादतो जिवन जगतो रेवं यी भटकंती कायम थंबाये सारु आदिम काळेर बायी पोरी खेतीर खोज किदी , बी बियाणो बायी पोरी धुंडन काढी . येरो पुरावो हर इतिहासेर पानेपानेपर मळ छ .
*खेती करेसारु दातळी धुंडेवाळी भी महिलाज हेती* खेती तो धुंडी , बी बिजवायी भी धुंडी , पेरणी पेरेसारु पेनार जमानेमायी बी पेरेसारु जमिनेपर किर काडे जगु *दातळी* धुंडन काढी .
*दातळीरो कार्य*
दातळीरो कार्य खेतीमायीरो अनावश्यक अन बांडगुळ तण वकडन फेकणो अन *दातळीर खरपो* मारन बारीक बारीक बांडगुळ तण , खडेन वोतेर वोतं दातळीर एक खरपो मारन वला नाकेरो काम दातळी करं छ .दातळार मेहनतेसी अन खरपो मारेसी खेतारीमायी निकोप माल उपज छ अन करसाण भायीर घर माल तालेसी भरान टट्ट हेजावं छ .
वोसोज कलुसित समाज मनेमायी बायी पोरी विरोधी जी विक्रुत पुरुषी मानसिकता तयार करेवाळे कायी बांडहुळ समाजेमायी उपजरे छ . आसी विक्रुत मानसिकतान वेळीज आळा न घाले तो समाजेमायी स्री विरोधी विक्रुत मानसिकता फोपाजाय अन कायी मुठीभरे लोकुर वजेसी तमाम बंजारा समाजेपर मानव जगतेमायी स्री द्वेष्टा समाज करन इतिहासेमायी नोंद जगु *दातळी साहित्य संमेलने सामुसी* नानकीसी कोसीस करेम आयं वाळो छ. करन हाम सदर संमेलनेरो नाम *दातळी महिला संमेलन* रकाडी छा .सब समतावादी भाईबंद सहकार्य करीयो यी आशा …..
जिजा राठोड
साधना राठोड
नंदा मथुरे
अश्विनी राठोड
प्रा . अनिता राठोड
सौ . नंदा आडे
सौ नंदा राठोड
सौ सुमन राठोड
सौ निर्मला पवार
सौ अन्नपुर्णा राठोड
जिजा राठोड
