” चांदा…जपं..जो…!”
ये लेंगी माइर सौंदर्य दर्शन..!
चांदा जपं..जो..! ये लेंगीर रसग्रहण करतूवणा; सेर आंगड्या लेंगी कतो कायी? इ समजन लेणू महत्वेर छ.
” वाड;मय अन कला क्षेत्रेमाइरो गोर बोलीभाषारो अदभुत आसो मुक्त आविष्कार कतो लेंगी..!”
जगेर पूटे परेरी 6000 भषाम बी लेंगी सरिको अदभुत भाषा आविष्कार धुंडेतो बी लाबेनी.ऊ श्लील छ तो अश्लील बी छ.ओरे अश्लील स्वभावेलारं मानववंश शास्त्रीय कारण बी छ. अदभुत ईज साहित्य अन कला क्षेत्रे माइरो वास्तव छ येरो उत्कृष्ट उदाहरण लेंगी छ. करन येनं Romanticism इ इंग्रजी पारिभाषिक नाम सुसंगत ठरचं.
ये लेंगीर भाषा शिवारेमं फरतूवणा आपणे प्रियकरेर वाट जोंयेवाळ एक व्याकुळ छोरी आपणेनं भळचं.ये चांदा..! आज मारो प्रियकर मन भेटेनं आयेवाळो छ..रे. तू छी तो आज घडीभर जपजो..अन तारो वजाळो ये चमचम चमकेवाळे ये तारापं पाड.ये तारारे वजाळेती चारोळी सरिक राय वियेअन मारो प्रियकर मारताणू पुच जाये..आस ये लेंगीर मध्यवर्ती कल्पना छ..
‘ चांदा जपं..जो..
रात आंधारी कर..जो..
चांदा..जपं..जो..रं…
चांदा छांयी चांदणी
चारोळीसी रात..रे..
तु तो आजेरी रात ;
रंजाण कर..लं..
चांदा जपं…जो..र..
प्रेयश भावनारो प्रामाणिक चित्रण ये लेंगी माइती उमटो हुवो छ.आपणे प्रियकरेर वाट जोंयेवाळे प्रेयश मनेर ; चांदा..जपं..जो..रं..!इ विषयानुरुप भाषा एक वास्तव प्रेमेर अनुभव प्रकट करेवाळ सिद्ध वचं; येमं कतीज कृत्रिमता आढळेनी. ..!
ये लेंगी माइर चारोळी सरिक रात ये आरथेर गोर छोरीर “चारोळीसी रात”इ उपमा अलंकारिक भाषा तो गोर छोरीर प्रतिभा, काव्यदृष्टी अन कल्पकतार जाणीव तो करदचं ओर साथोसाथ रसिक मनेनं भुळी बी खरा दचं…!
चांदोबा..! आज मारो प्रियकर मनं भेटेनं आयेवाळो छ रे..तू छी तो आजेर रात मार सारु ‘ रजा’ ले लं..!प्रेमी युगुलेरो आतरा सुंदर ” वियोग चित्रण” ई गोर छोरी साहित्येरे दालनेमं हुबो करमेली छ.
‘ छोरी म कुंवारी
पित पियारी रे..
म तो जोंऊ रे वाटं;
पियारी सारी रात
चांदा..जपं..जो..रं…!
ये चांदोबा..! म मार प्रियकरेर लाडकी प्रेयशी छू अन कुंवारी छू भेनं..! इ बी तू भूलेस मत..! आपणे इज्जतेर पंचनामा न वेणू येर सारु आधिकार वाणीती चांदानं जप जायेर ताकीद दचं..प्रियकरेर भेटी सारु एक व्याकुळ मनेरो उत्कट आविष्कार ये चरणेमं उमटतो दकावचं… ‘ सी’ अन ‘ जोंऊ’ (सरिक अन प्रतिक्षा) आसे आलंकारिक शब्देती नटो हुओ भाषारो एक सुंदर चेहरो इ गोर लेंगी नायकण रसिके हुड्यांगं हबो करमेली छ..
” म तो जोंऊरे वाटं पियारी सारी रात..!’
इ विरहेर व्याकुळता स्पष्ट करेवाळ भाषा तो सुदोसट कळजेनं भीडचं..!
जपं..जो..रे…चांदा
काळे बादलमा..
म तो छमछम घुगरा;
वजावू सारी रात
चांदा..जपं..जो..रं…
चांदोबा..! मन सारी रात निंद आयेनी…रे..! ये पाकतीती ओ पाकती फरू जना मार टांगे माइर घुगरा सारी रात छमछम वाजू करचं..रे..ये लेंगी माइर ‘ छमछम घुगरा वजावू सारी रात ‘ इ नादानुकारी शब्द रचनार भाषा तो ” वियोग शृंगार रसेर” ऊत्तम उदाहरण छ.
लेंगी इ सौंदर्य स्थळेती नटो हुवो एक सुंदर आसो भाषा शिवार छ. ये भाषा शिवारेमं फरतूवणा आयेवाळ मजा न्यारीज छ.
‘ ऊंहू..! काळकीट रात मन चायेनी तो ” चारोळीसी रात”मनं चावचं भेनं..!
ये लेंगी माइर गोर छोरीर इ कल्पना कतरी अदभुत छ; कोनी कायी..?
तांडे माइर छोरीर काव्यदृष्टीर इ कल्पना तो अथांग छ..गजब प्रतिभा…??????
भीमणीपुत्र
मोहन गणुजी नायिक
-गोर कैलास डी राठोड
गोर बंजारा न्युज पोर्टल मुंबई महाराष्ट्र राज्य,
Tag: Banjara Live National News, Indian Banjara News, Lamani, Lambadi
