“बंजारा समाजेम 1 जानेवारी इ नवो साल छेनी”
भियावो जय सेवालाल👏🏻
गोर बोली,गोर वाणी.गोर भाषा,लिफी, ये से वातेर विचार किदे तो खरो खर गोर बंजारा संस्कृती जगे वेगळी छ।
येरो कारण कु केयेरो जगे वेगळ तो आंग जे लकेम आयोच..वो वाते बंजारा समाजेर बुद्धिजीवी साहित्यकार मारतीया रामचंधिया भुकीया, भिमणी पुत्र मोहन नायक,समाजेर साहित्य कलाती जास्तीत जास्त मन जुळान काम कररेच, वोंदेर कामेर आभिनंदन करूचु.नविन पिढी घडायेरो आन नविन पिढीन गोर वाणी,गोर बोलीर खर औळख करान देयेरो काम कररेच,
भाईयो..खास करन बंजारा समाजेर 1 जानेवारीती इ नवो साल लागेनी.. आन 1 जानेवारीती गोर बंजारा समाजेर एक आनारो भी लेणों देणों छेनी.का कतो गोर बंजारा समाजेम नवो साल ई होळीर दाडेती म्हणजे कोरेम बोलाचा पूर्णिमा आन गोर वाणीम बोलाचा हेडगी पूनव, ई हेडगी पूनवेर रात आपणे समाजेर नाक्या बालबच्यार ढूंडेर कारेकरमेवास जात भर जागण करच. दुसरेदाड परभाती होळी बाळच, वो होळीन बोलच ईडा पिडा तार पदरेम लेल याडी,हामार ढोर जीनगाणीर,खुटामुंगरीर,हामार बालबच्यार उपरेर सनकट तार सोबत बाळलेस याडी. आयेवाळे दाड हामेन सासी वेणूं..आयेवाळे दाड आचे रेणूं.।.बंजारा समाजेम होळीन नवे कपडा सिडान पेरच, सारी लोक हुसेती होळीर वाट देकच..होळीर दुसरे दाड फाग मणजे फागेर दाड रच…रंगेती एकमेकेन रंगच, लढाई बोलाई वेगी वेणू तो वोन भी बोलन रंग नाकच, कोरेर मिना पाल्गुन मणजे गोर समाजेर फांग ये मिनाती गोर बंजारा समाज सालेरो पेलो मिना मनावच. करन बोलेर छ। 1 जानेवारी ई गोर बोलीम आयेनी गोर संस्कृतीम आयेनी, जानेवारी ई इंग्रज लोकुन टेरायहुये मिना छ। आज भी कोरेम गुडी पाडवाती नवो साल मनावच. तो हाम का लोकुर संस्कृतीर परचार कररेता…हाम का 31 डिसेंबरेन दारू पिन हामारो वेळ बरबाद कररेचा. जर समाजेर बद्दल घडायेर विय तो खरोखर भियावो.एक वात बोलुचु…म तमार पेक्षा खुप नांनक्या छूं। आयवाळे 1 जानेवारीन आपण एक भी नवे सालेर सुभेच्छा देयेर बंद करा आन खरो खर आपणे समाजेर संस्कृतीर जे हाम भुलगेचा वोन हारद करा…
जर ये नवे सालेर मणजे 1 जानेवारीन गोर समाजेर मार भाई शुभेच्छा दिने तो गोर बंजारा समाजेर खुप मोठ शोकांतीका छ। आन खरो खरो आपणे आवडा घेतला कोई छेनी हानु समजेम आवजाय। आन खरोखर समाजेर कुण कुण विचार करच येर भी मालम पडजाय.
तो धेनेम रिदो “आपणो समाज आन आपण संस्कृती”
जय सेवालाल…जय गोर..
तमारो सुभचितंक
गोर कैलास डी.राठोड
स्वयंसेवक/प्रचारक
गोर बंजारा संघर्ष समिती भारत, व चिफ एडिटर
बंजारा आँनलाईन न्युज
Website:www.banjaraone.com
