बोदंरी (सरवां)
ध्यान देस बेबबायी मारी तू वातेप
बारयी मीना रूछूं म तारेच पातेप
छचारूर कपडा पडे छ मातेप
रोतू रोतू छोरा पडगोनी दातेप
ठीगळा मारन घागरो पेर मार वूदंरी
आपकांळ तरी वीळेंदेस मारमन बोदंरी..!
छोरा मार केरो तार फूटगी कायी आकी
घूंडी से तूटगी तू काकोनी देकी
जतराम तरी कपडा दरायीस क नक्की
तमार सारूछ रूयेलार छोडरीछू नकी
मेकपेर सामायीन मांग रोज सूंदरी
आपकांळ तरी वीळेंदेस मारमन बोदंरी..!!
जे दन करीस खेतेर वूलंगवाडी
मार मागारीया जरकायी ढोरढांडो छोडी
समजलेस बेबबायी तार पगच म तोडी
झगडी सकोना मार नाम फूकट छ थोडी
हारेताके हातपग छोरी रोज मार खूदंरी
आपकांळ तरी वीळेंदेस मारमन बोदंरी..!!
यी दरा वू दरा वेगो मातेन ताप
पावभर पीलेन गचप सोयेनी बाप
रातभर करूकर मटकारो जाप
डबोडाबी खोळखाळन करजाव साफ
खायेन तो चावचं बूंबलान बदंरी
आपकांळ तरी वीळेंदेस मारमन बोदंरी..!
कवी.
निरंजन मुडे
चिल्ली (ई) ता.महागाव
जि.यवतमाळ.
९०८२१९९८६७
प्रमुख प्रतिनिधी: रविराज एस. पवार
ऑनलाइन बंजारा न्यूज पोर्टल
Website : www.GoarBanjara.com 8976305533
