माटी सोडरो कोनी बाज.
(चांदनं चांदनं झाली रात)
©® कवी. निरंजन ब. मुडे
दि.२९,३० मार्च २०१८ अखिल भारतीय गोर बंजारा साहित्य संमेलन डोंबीवली.
*चार दनं, चार दनं वेगे आज…२*
*माटी सोडरो, सोडरो कोनी बाज…!*
पावेकं माचळी लीयायो
भटीपं जाताणीं पीयायो
गरीगरायी माचळी लीयायो
भटीपं जाताणीं पीयायो…
*हेटे वूचेती भररोछ व्याज..२*
*माटी सोडरो, सोडरो कोनी बाज…!*
पुढारी सोबत फरीयायो
जाताणीं फारमं भरीयायो
नेता रे सोबत फरीयायो
जाताणीं फारमं भरीयायो
*वू तो वेचनं खागो सारी लाज..२*
*माटी सोडरो, सोडरो कोनी बाज…!*
घरेमं दाळेरं पतो छेयी
छचारूनं रांदनं घालू कायी?
चूलेमं आंगारेर पतो छेयी
छचारूनं रांदनं घालू कायी
*पांदीमायीती लीयायो कतरारी गाज..२*
*माटी सोडरो, सोडरो कोनी बाज…!*
लोकलेमायी लटकरो
महागायीमं भटकरो
गरदीमायी आटकरो
महागायीमं भटकरो
*वू तो दूरतीजं वतारो हाटेल ताज..२*
*माटी सोडरो, सोडरो कोनी बाज…!*
लाखीया बळद फरीयायो
हारोहारो चारो चरीयायो
होंडा बळद फरीयायो
हारोहारो चारो चरीयायो
*नंदी बळदेप चडानाको साज…२*
*माटी सोडरो, सोडरो कोनी बाज…!*
*चार दनं चार दनं वेगे आज…२*
*माटी सोडरो, सोडरो कोनी बाज…!*
*©®कवी. निरंजन बळीराम मुडे.*
*चिल्ली (ई) ता. महागाव जि. यवतमाळ.*
*हल्ली.. नेरुळ नवी मुंबई.*
९०८२१९९८६७
