वोसो, केरो छं
शुद्र पेदा का वेगे हारीजण पेदा का वेगे ,
पेदा वेयेरो कारण छं , दनीयाम वर्ग (classes ) जमानेती छं .
पणन वर्ण , वर्ण हिंदूसतानेर आपणो येक मातो छं , वर्ण ये दनीयाम कतीज छेनी, वर्ग (classes) जमानेती छं, कोयी गोरगरीब वे सकं छं तो कोयी मालदार (पीसा आदला) वाळो वे सकं छं.
पणन ब्राम्हण, शुद्र , क्षत्रिय आन वैश्य दनीयाम कतीज छेनी .
वर्ग (classes ) येरो आरत आसो छं क कोयी मनकीया गरीब वे सकं छं नतो मालदार ( पीसावाळो) वे सकं छं.
पीसावाळो गरीब वेसकं छं नतो गरीब पीसावाळो वेसकं छं .
हिंदूसताण येक घणो चाणक्येर काम कीदो छं , गरीब आन पीसावाळेर मायीर जे प्रतियोगिता वेती वू खतम करनाके आन वो निश्चित वर्ण पेदा करदीने , वर्णेर आरत ठोस हेगो वर्ग जेरे मायी बदल वे सकेनी जमगे भा वर्ग (frogen class ) शुद्रेन आन गरीबेन वो केदीने की बस आबं तू जमगो छी, तार मायी आबं बदल वे सकेनी, आबं तू हेटेती वूपर कोनी जा सकतो, वूपरेर वरगेन येरो फायदो आसो वेगो की आबं हेटेर वरगेती वोर compition खतम वेगी ,
हिंदूसतान येक तरकीब कीदो की compition खतम करेर वो करोडो शुद्रेती compition खतम हेगी आब वोनूर छीचाबर बामणेर बेटबेटाती संघर्ष कर सकेनी, आबं वोनूर छीचाबर वैश्येर बेटबेटाती जापा पीसावाळ वेयेर संघर्ष कर सकेनी, आबं वोनूर बेटबेटा बहादूरे सरीक लढ सकेनी क्षत्रियेर बेटबेटाती , येक मोटो वरगेन, हेटेर गरीब वरगेन जमानाके (frogen class ) आन आबं कवाड बंद करनाके आबं तम कतीज आ जा कोनी कर सकते , वूपरेर वरगेन फायदो हेगो, पछं नीती जमानाके शूदरेर बाद वैशयन भी जमानाके आन वोनून येर आंघ तू बढ कोनी सकतो , आन गेन (ज्ञान) तार दनीया छेनी , क्षत्रियेन केदीने की यश तार दनीया छं पणन ज्ञान तार दनीया छेनी आन सारीर वूपर जे कायीं गेन वेन (ज्ञान, वान) जो पंडित छं, बामण छं वो बेसगे आन ये वर्ग जमानाके येती compition खतम वेगी आन समाज जड वेगो, हिंदूसताणेन वर्णेती जतरी मोत (मरण) जतरी जड मळी वतरी कूणसीज वातेती कोनी मळी,
येरो परीणाम आलग आलग रूपेती घातक हीयो , हिंदूसताणेप हामला हेगो जना शुद्र तो केदीनो हामेन कायीं मतलब छं , शूदरेन कायीं मतलब छं , भंगी भंगीज रीय चाये मसणमान दिल्लीम बेटीय, हिंदू बेटीय, आंगरेज बेटीय. भंगीम कायीं फरक पढेवाळो छं. भंगीतो केदीनो हामारो तो भाग्य तय छं कछं भा , तो कोयीभी राजा हो हामेरो कायीं नूकसाण छं भा. हाम तो हामार काम करते रीया , हिंदूसताणेर सारी वीराट जणता वर्णेर कारण हिंदूसताणेर जीवणेम धाक भरागी (विराज पुर्ण ) हेगी आरूचीती भरागी,
हिंदूसताण कनायी गूलाम कोनी हेतो जर हिंदूसताणेम शुद्र न रेते, हिंदूसताण कनायी गूलाम कोनी हेतो जर हिंदूसताणेम वर्ण कोनी रेतेतो, ये हिंदूसताणेर वर्ण व्यवस्थाज हिंदूसताणेम आसे तकता वाट दीने की , येके आदमीनं कायीं चींता करेर जरूरत कोनी रेगी, फकसी थोडाखांढ लोकून हेती क्षत्रियेन की हाम हामार राजेन बचावा , बाकी पूरे देसेन कायीं पडी कोनी हेती , गोरगरीबेन कायीं पडी छं मोटे लोकूर लढायीती , फरन वसोज हेगो यींघरज हिंदूसताणेती चलेगे गोरगरीब वचार कीदो हामेन कायीं मळजाय, पछं वोनून कळो कायीं मळेनी यींघरेज बदलजावछं आन हिंदू पूंजिपती बेसजाव छं , गोरगरीब आपणी आपणी जागेपज छं वोनं कायीं फरक पडेनी, मोटे लोकूर लढायी छं वूपरेर लोकूर लढायीती हेटेर गोरगरीबेन कायीं लेणो देणो छं, यी हिंदूसताणेर हाजारो वरसेर शूद्रेर वर्ण व्यवस्था टूटेर आसी स्थिती जमानाके की हिंदूसताणेम कूणसीज समाजीक धारणा कूणसोज राष्ट्र आन कूणसोज नेशन कूणसोज पेदा वीयो कोनी, पणन जे लोक येनूर वीरोधेम हूभेते वोभी गोरगरीबेर मोलीक आधारेर वीरोधेम छेनी गांधीजीन वाटतोतो आछूत मीट जाय पणन वो कर्मेर सींधातेप येक भी शबद वीरोधेम कोनी बोले, आपणेनं मालम भी कोनी हेणू क हिंदू जे व्यवस्था बणा मेलो छं, वोनूर मातो आतरा सीसटम मेकर रीयो छं की, वो सींधातेर आतरी वेवसता करन मेल मेलेछं की, सींधातेर मूकाबलेम हामारती मोटे आन माते वाळे कोयीज छेनी तम ढूंढयो तरी तमनेनं मळं कोनी, हाम आतरा आछे छा सींधात बणायेम जेरो कोयी हासाब छेनी हानू बामण कछं. यी वात हाम हानूज कोनी बणानाके येर लार हाम पूरो मनोवैज्ञानिक धारणा आन हामारो आसो केणो छं क जो मनकीया जसो कर्म करं छं वसोज वोनं जलम मळं छं , शुद्र वो लोक छं जे पाप कर मेले छं वो शुद्र वरगेम पेदा वछं आन बामण वो छं जे पूनय करमेले छं वोनूर जलम बामणेम वछं, लारेर जलमेम जसो मनकीया कर्म करमेलो हेणू वसोज वोर चार विभाजन वसे चार विभाजनेम लोक पेदा वछं , वोर करता शुद्र भी बीचारो राजी वेगो वो भी बगावत कोनी कीदे वोनून वाटो लारेर जलमेम कायीं तोयी खराब काम कीदे हीया करन हाम शुद्र हेगे आबं आछे कर्म करीया तो आगले जलमेम बामण बणीया, आगले जलमेर आसाम वो आज शुद्र हेयेन राजी वेगे छं, हिंदूसताणेर शुद्र राजी छं आगले जलमेर वाट देकरो छं, आन हिंदूसताणेर मातो बेमान छं, जेनं भी राजी करायेर छं वोनं आगले जलमेर आसा वताळ दछं,
जतेलगू ये करमेर वीचारसरणी न टूटीय आन जतेलगू आपण येर व्याख्या कोनी करा वतेलगू शुद्रेन मुक्त हेयेरो मसकल दकावछं , बडी मजीयार तो यी वात छ की जे वातेती वोनून मुक्त (मोकळे ) हेयेर गरज छं , वो वोतीज भंदायेर कोसी कररेछं, विनोभाजी आन गांधीजी वोनून वोज मंदीरेम लेजायेर वात कररेछं जे मंदीरेती वोनून मुक्त वेयेन चाय घणी मजीयार वात छं, जे हिंदूपूरोहीतेती मोकळे हेयेर छं गांधीजी आन विनीबाजी केरे छं मंदीरेम शुद्रेन लेजायेर छं, यी मोटी क्रांतीर वात छं की मंदीरेम शुद्रेर परवेस हीय केर मंदीरेम जे की वोनं वो शुद्र बणाये वोरज मंदीरेम , वोज पूरोहीतेर मंदीरेम जे वोनून शुद्र बणाये, जे हाजारो वरसेती वोनूम हाल पाढे आन तरास दीने मतो कींव की येक भी शुद्रेन कूणसेज मंदीरेम न जायेन चाय, जर सारी बामण आन पगू पडे तरी भी न जायेन चाय , का जावं वो मंदीरेम जे मंदीरेती तम तूटे आन बरबाद वेगे पणन गांधीजी आन वोनूर सारी सोबती कछं की मंदीरेर दरवाजा खोलो हाम शुद्रेन मायी लेजायवाळे छा, घणी क्रांती हेरीछं शुद्रेन मंदीरेम लेजायेर , बामणेर जो ढीलो हेगो जकोण पंजा फरन कसेवास यी शुद्रेन मंदीरेम लेजायेर येक चाल छं, फरन वोनूर हातेम शुद्र आजाय मंदीरेम जाते खमत , आज घढीन वर्ण टूटेलागे व्यवस्था टूटेन आवगी करन वोनं फरन नवो चेहरा (मूंढो) देताणी वोनून व्यवस्थामायी रकाढे वास यी चाल चालरी छं कारण डर छं वोनून की शुद्र हिंदूर भारं नं चलेजावं पणन खरो तो यी छं की केनी भी हिंदू हेयेर गरज कायीं छं, केनी भी मसनमान हेयेर गरज कायीं छं , *आदमी* (मनकीया) हेणो परयाय (प्रयाप्त) छं, जेनं मनकीया हेयेर प्रयाप्त मालम छेनी वू कायीं हिंदू नतो मसनमान वेयेती वू कायीं मोटो वीकसीत वेवाळो छेनी , *मनकीया* हेणो काफी छं, हिंदूसताणेम येक क्रांतीर जरूरत छं , शुद्र तो केदेयेन चाय हाम हिंदू छेनी पणन जे लोक शुद्र छेनी वो भी केयेन चाय हाम हिंदू छेनी, आन जे लोक बूदीमान छं वो भी केयेन चाय की हाम हिंदू जैन आन यीसायी छेनी, जर हामनेन सतेरो खोज लगायेर वेणू तो जर हामनेन भगवानेन ढूंढेरज हेणू तो हिंदूर मंदीरेम कोनी मसनमानेर मंदीरेम कोनी आतरी मोटी वोर दनीया छं , आतज हाम वोनं ढूंढीया हाम कसेन कूणसे बंद दरवाजेर मंदीरेम वोनं ढूंढा भा , आतरा विराट वीरो मंदीर यी दनीया छं , पणन येरवास हीमत शुद्र भी कररो कोनी वो भी केरे छं हाम हारीजण छा हामेन आधिकार दो हामनेनं जमीन दो हामार वास मंदीरेर दरवाजा खोलो हाम मंदीरेम जावछा ,
तम केर कनती आधीकार मांगरेछो आन धेनेम लो आधीकार मांगेवाळो कनायीज स्वतंत्र वे सकेनी आधीकार मांगेवाळे कसकायीं स्वतंत्र वे सकं छं , जेनूर कनेती तमनेनं आधीकार मळीय तम वोनूर प्रतंतर बणेहेज रेवाळे छं, जे लोक तमनेनं हाजारो वरस दीमागेर साचा बणान मनकीयान कसमेलेछं वो आतरा हूसीयार छं की वो नवे साचा बणालीय आन फरन कसलीय पणन सारी जाळ तोडन भारं आयेर गरज छं , कूणसेज हींदूर मंदीरेम शुद्रेन जायेर गरज छेनी, आन कूणसेज शुद्र सवतान हारीजण केयेर गरज छेनी, *आदमी* ( मनकीया) केराणू घणो गरजेरो छं.
*वोसो*
भासीया बदन लकेम आयोछं.
हिंदीर गोरमाटीम लको छू.
✍????भास्कर राठोड, ठाणे.
प्रमुख प्रतिनीधी, रविराज एस. पवार 8976305533
webside, www.GoarBanjara.com
Tag: Banjara Live News
