।। *सहावे नसाब विषयरो निष्कर्ष* ।।
======================
एक काळ असो वेतो की, समाजेबद्दल चिंतन आणि चिंता करेवाळ लोक जना घरेभार पडतेते तो ओ फक्त समाजेसारुच भार पडतेते . समाजेरो भलो कुं विये येरोच विचार ओ रातदन करतेते . ओ फक्त आणि फक्त समाजेबरोबर रेताणी समाजेन मोठो करेसारु काम करतेते . आज काळ बदलगोच , लोकुरी अपेक्षा, महत्वकांक्षा बढगीच . करन आजेर अधिक नेता लोक स्वार्थेमा डुबरेच . जे समाजेसारू थोडाफार कांई तरी कररेच समाज उनु सामु देखेन , उनुन इज्जत देयन तयार छेनी . ई समाजेरो मोठो दुखणो छ .
आज समाजेमा दि प्रकारेर नेता लोक दिसायेन पडच छ . एक तो समाजेरो नाम तो लच पण समाजेसारू कांहीच करेनी आणि दुसर प्रकारेर समाजेरो नाम बी लच आणि समाजेरो काम बी करच. असेर संख्या घण कमी छ . समाजेर भावनार कदर करेवाळेर आज कमतरता छ . आज घडीन समाजेर नामेती पेट भरेवाळेर संख्या जादा दिसायेन पडच .
टीका करेर हेतुती कोनी पण समाजेन माहिती देयेसारू करन आत मुद्दाम हमारे समाजेर काही नेतार नाम लेणु वाटच . आ . मनोहरभाऊ नाईक , आ. प्रदीप नाईक , आ . तुषार राठोड येनुन समाज आपण नेता करन मानच . समाज येनून इज्जत दच , सन्मान करच . मोठी अपेक्षाती समाज येनुर सामु देखच . पण आब ये सन्माननीय आमदारेऊन पुछेर वेळ आवगीच की तमारो गोर बंजारा समाजेती कांई नातो छ कांई ? तम स्वत:न समाजेर करन मानोचो कांई ? जर मांनते वेणो तो समाजेरे सुखेमा तो कोई बी आवच, पण समाजेरे दुःखेमा समाजेसोबत रेयेर छेनी आस सोगन तम खा मेलेचो कांई ?
कोपरडी प्रकरणेरोसंदर्भ लेताणी मराठा समाजेर इतर प्रश्नेसारू मराठा समाजेर सारी नेता एक वेताणी सरकारेपर दबाव लाताणी समाजेरी मांगणी पदरेमा पाड सकच, तो हमार नेता समाजेसारू , समाजेपर वेयवाळ अन्याय ,अत्याचारेर विरोधेमा साधा मुंडो न वगाडते वेणो तो असे भावनाशून्य नेताऊन समाज आपण नेता करन का मानेन चाये ? का येनून समाजेमा फरेन देयेन चाये ? समाजेरे व्यासपीठेपर येनून बेसेन का जागा देयेन चाये ? लारेर सालेर नाशिकेर , ताजी हनुमंतखेडार घटना माथो सुन्न करेवाळ रेयर बाद बी ये आमदार लोक भाटा वांगु बेसन तमासो देकरेच . ओ गामेन जाणो तो छोडो पण साधा विधानसभामा बी मुंडो वगाडेन ये तयार छेनी ! ये दुर्दैवी घटनार दखल लेताणी आ . हरिभाऊ राठोड प्रत्यक्ष ओ गामेमा गे . विधान परिषदेमा प्रश्न वटाये करन सरकार थोडा गंभीर वियोच . विधानसभामांईर हमार नेता लोक गुंगे , मुके वेताणी आज बी बेटे हेरेच. ठीक छ तम समाजेर नाम लेताणी मोठे कोनी विये वेणो , पण समाज जर तमारे कनती कांई अपेक्षा करतो वेणो तो ऊ चुकीर छ कांई ?
असे संवेदनहीन नेताऊन समाजेरो एक केणो छ तम आतरा मोठे छो की , समाजेर तमनेन गरज छेनी. करनच तम समाजेर गंभीर प्रश्न , अन्याय , अत्याचार येर विषयी मुंडो वगाडेर तमेन गरज वाटरी कोनी वेणो ! ओरे कारणच तम सारी मौनी बाबा वेन बेटेचो . तमेन कुं बेसेर छ ओ पद्धतीती बेसो . समाजेरो कांई केणो छेनी , पण समाजेपर एक उपकार करजो . तम एक घोषणा करदो की *हमारो आणि गोर बंजारा समाजेरो कांहीही संबंध छेनी समाजेपर वेयेवाळे अन्याय , अत्याचारेती हमारो कांहीही लेणो देणो छेनी .* समाजेन कुंण आपणो छ यी तो कळजाये . आपणो – परको देखन समाज पीडामुक्त तो वेजाय .
” समाजेमांईर असे नानक्या मोठे मुर्दाड, गुंगे , बेरे आणि मुके नेताऊती याडी जगदंबा आणि सेवाभाया गोर समाजेन बचाव . ”
असे लिंबेरे पालेर कडीवक गुटी न पचती विये तो समाज हमारे मुंडीयांग ई कडीवक चीज का मेलरोच येरो विचार , आत्मा वियेतो आत्मचिंतन असे मौनी नेता लोक जरूर करेन चाये .
खरो दिटेतो समाजेरो नेताऊन आधार रचच आणि ऊ रेयनच चाये , पण ओर सोबत नेताऊरो समाजेन आधार बी रेयेनच चाये, भले ओ समाजेरो नाम लेताणी मोठे कोनी विये वेणो . पण उनुरो लोई गोरुरो छ. करन ओ समाजे सामु देखेन चाये . ये दोई चाके बरोबर री तो समाजेन एक वेगळी ऊर्जा मळ सकच .
आयेवाळे काळेमा नेताऊरी जबाबदारी घणी बडेवाळी छ . समाजेपर नवनवीन संकट आवरेच . करन समाजेर पदर पकडन मोठे वेयेवाळ, समाजेर पदर न पकडेवाळ नेता लोक समाजेती नाळ तोडन न वागणु ई एक रास्त अपेक्षा समाज सारी नेतासामुती करच . तम मोठे हो आणि समाजेन बी मोठो करजो . समाजेन ताकद देयर आदत नेता लोक लगाडणु ई बी एक भोळी भाबडी आशा समाज नाने – मोठे नेता सामुती करच .
जयसेवालाल !
*नसाब ग्रुपप्रमुख*
*फुलसिंग जाधव,औरंगाबाद*
Whatsapp No 9595765235
—————————————-
Chief Editor – Gajanan D. Rathod
