आज गोरसिकवाडी ई शब्द नाने मोटेर मुंडेपर छ. गोरसिकवाडी ई आज ट्रेड मार्क (व्यापार चिन्ह ) बणगोच. पण आजेर पिढीन सिक आन सिकवाडी केन कछ इच मालम न रेयर कारण बोलतुवणा ११२ इंच छाती फुलान कछ गोरुन फक्त गोरसिकवाडीच आंग लेजा सकछ . ई आजेर पिढीरो अज्ञान केयेपेक्षा उनुन सिक आन सिकवाडी येमांईरो फरकच कोई समझान के कोनीछ. उनुन बी ई वात समझन लेयर कनाई गरज बी वाटी कोनीच. कान बंद करन सांभळते गे छाती फुलाते गे !
*सिक आन सिकवाडी मांईरो फरक*
१ . *सिक :-* सिक कोई बी, केनी बी, कत बी दे सकछ. गोर कोरीकोरेऊन सिक दे सकछ. कोर बी गोरुन सिक दे सकछ . रात रो क दन . चालतु – बोलतु, उठतु – बेसतु , जत जमीये वत सिक देतो आवछ. कुणसी बी बाई माणसेन , कोई बी माणस बाईन , याडी – बाप बेटीबेटान, सोबत्या सोबतीन, सोबतण सोबतणेन , नणंद भोजाईन, भोजाई नणंदेन सिक दे सकछ.
२. *सिकवाडी* :- सिकवाडी विशिष्ट प्रसंगेनच दछ. सिकवाडी कती बी कनाई बी देतो आयेनी. सिकवाडी कोई बी केनी दे सकेनी.
*सिकवाडी कुण दे सकेनी? :–*
१. कुणसीच बाई सिकवाडी दे सकेनी.
२. मोटेन नानक्या सिकवाडी दे सकेनी.
३. गोर कोरीकोरेऊन सिकवाडी दे सकेनी .
४. कोरीकोर गोरुन सिकवाडी दे सकेनी .
५. भावकी भावकीन सिकवाडी दे सकेनी .
*सिकवाडी कुण दे सकछ? :–*
१. सगासेणेन सगासेणच सिकवाडी दे सकछ .
२. नानक्यान मोटोच, नतो बरोबरीरो माटीच सिकवाडी दे सकछ.
*सिकवाडी कना दछ ?*
दुःखद प्रसंगेरवणाच सिकवाडी दछ . केरी घरे मांईरो कोई मरगो तोच भारेर लोक ( भावकीर भारेर / सगासेण ) सिकवाडी दछ. मटी करन घर आयेर बादच सिकवाडी देयेर प्रथा हेती. आब बी कती कती ई प्रथा जीवत छ .
*सिकवाडी नामेती जाहिर कार्यक्रम लेतो आवछ कांई ?*
सिकवाडी ई दुःखद प्रसंगेनच दछ करन *सिकवाडी* नामेती जाहिर कार्यक्रम लेतो आयेनी. ये वेळापर भोग लगातो आयेनी. भाषण करतो आयेनी.आणंद , खुशी मनातो आयेनी. मळाव भरावतो आयेनी. *सिकवाडी* नामेती चळवळ चलावतु आयेनी. *सिकवाडी* नामेती संघटना, राजकीय पक्ष काढतो आयेनी. *सिकवाडी* नामेरो कटमाळो रे सकेनी.
*सिकवाडी* दुसरेरो दुःख हालको करेर , सांत्वना देयेर ई एक जुन रीत हेती. आब कती तरी दिसावछ. *सिकवाडीर जाग आब श्रद्धांजली आवगीछ.*
सिक आन सिकवाडी मांईर ई थोडीसी माहिती छ.येरेबद्दल जाणकार लोकु कनेती जास्त माहिती मळ सकछ.
*फुलसिंग जाधव* योगसाधक
औरंगाबाद
Whatsapp No 9595765235
Tag Gor sikwadi, Sikwadi, Banjara Advice, Ja Sevalal
