सेवा ई घणो आचो छ नाम
सेवा नामेती व्हेरे घणे आचे काम ।।धृ ।।
कोई कचं सेवा कोई कचं बापू
हाम जगेरचा सेवा तारे नामेवासू
कोई कचं लाल कोई कचं दास
सेवा नामेती हाम कररेचा आरदास
कोई कचं बापू कोई कचं सेवा
सेवा नामेपर आजेताणी खारेचा मेवा
कोई कचं सेवा कोई कचं भाया
सेवा करेवासं कांईजणा कोणी किदे वाया
कोई कचं भाया कोई कचं लाल
सेवा नामेती व्हेरेचा हाम मालामालं
सेवा नामेती हाम कररेचा समाजेर सेवा
बडरेचा आंग केताणी गण तारो गावा
सेवा नामेती हाम आज कररेचा काम
आची बल्ला वातेनं देरेचा सेवारोचं नाम
सेवा नामेती हाम काडरेचा कालेज शाळा
हां-जी हां-जी करेवाळेनं बगलेमाई करलीदे गोळा
सेवा नामेरो जप हाम रात-दन कररे
आडमिसने सारु विद्यार्थी कनेती डोनेशन लेरे
सेवा करेसारु डोनेशन लेतानी आडमिशन देरे
वजी विद्यार्थीर हक्केर मळरी जको शिष्यवृत्तीबी लेनं खारे
सेवा करेसारु अध्याप-प्राध्यापक पदेर जाहीरात देरे
बुद्धी-ग्यानेसामु छेनी ध्यान जादा धन देरे वोनच लेरे
गल्ली ती दिल्लीताणी चलोगो सेवा तारो नाम
करतांणी आंग तोनं सादलेरे हामारो काम
सेवा कोई कररेचा क्रांती, कोई काडरेचा दल
सेवा करेवास गोरुर, करेचा हाल हाल चालू
सेवा नामेनं लागो राजकारणेरो रोग मोटो
छोडताणी सेवानं हरेक गोर मोटेपणेलार धांटो
कोई कररे पुकार, कोई देरे सिकवाडी
कंटीराम केरो गोरो तम छोडो जुनी रुडी
के.टी. राठोड नांदेड
मो. 9881135057
