मराठान आरक्षण दिने, पछ बंजारानभी आरक्षण दो….आत्माराम जाधव
जय सेवालाल भाईयो, काल महाराष्ट्र विधानसभाम मराठा समाजेन आरक्षण मलेसारु विधेयक पारीत करताणी ये महाराष्ट्र राज्येरे राज्यकर्ता ये राज्येरे सारिम मागासवर्गीय समाज मराठा समाजेन १६% आरक्षण देयेर मार्ग मोकळो कर नाके, मराठा समाजेन नौकरी आणी सैक्षणिक आरक्षण मळे वाळो छ। मराठा समाजेरे प्रत्येक प्रत्येक पार्टीम आमदार छ, जेरे मुळे ये विधेयेकेन कोइच विरोध कोनी कीदे, एस. सी. अन एस.टी. रे लोकुन येरो फारक कोनी पडरो करन वो आवाज कोनी वठाय , बहुतेक पार्टीरे नेता मराठाच छ करन इतर नेता आवाज काढ सकेनी। मराठान विरोध करणु म्हणजे राजारे विरोधेम राजद्रोह करणू अशी आज प्रत्येक नेतार अन कार्यकर्तार हेगी छ। वोरेमुळे मराठा लोक सारी वातेशी सधन रेताणी भी आज आरक्षण मळा लिदे ।
बंजारा समाजेरे हमार भाई आज भी ये मराठार खेतेम साटा तोडताणी येच मराठार साखर कारखाना चला रे छ। हमार बालबच्छा शाळा छोडन मोळी बांधरे छ, अन मराठा री विद्यापिठ,इंजीनिअरींग कालेज, मेडीकल कालेज, मोठी, मोठी संस्था चाल री छ। हमार लोकुन झुपडी रेयेन छेनी येनुरे बंगला छ, प्रत्येक जागेप मराठा आंग छ , तरीबी मराठान आरक्षण चाव छ कारण बळी तो कान पिळी ।
दुसरी बाजून हमार समाज अतिशय मागास, अन दारीद्र्य्रेर जीवन जगन भी हमनेन आरक्षण छेनी। हमार समाजेन विमुक्त जातीम आरक्षण छ जो की ३.५% छ, जेरे माई १४ तत्सम जातीरो समावेश छ। म्हणजे हमार हिस्सान ०.२१% आरक्षण आवछ। तो ये हमार समाजेप अन्याय छ। येरे वास म आत्माराम जाधव ,राष्ट्रीय अध्यक्ष, राष्ट्रीय बंजारा टायगर्स सारी संघटनार पदाधिकारी अन राजकिय नेता, समाजसेवक अन सामाजीक कार्यकर्तान विनंती करु छु की आपण एक हे जावा अन आपणे समाजेन महाराष्ट्रेम १०% आरक्षण किंवा केंद्रेम एस.टी. माई समावेश करेसारू सरकारेन भाग पाडा। आवो भाईयो एक मोठो जन आंदोलन उभो करा, आब कोनी तो आरक्षण छेनी , आओ सारीहेन साथ दो ……जेन ये जन आंदोलनेम सहभगी हेयेर छ वो राष्ट्रीय बंजारा टायगर्स संघटनार पधधिकारीन किंवा वेबसाईटेम संपर्क करणू….अशोक चव्हाण, महाराष्ट्र प्रदेश सरचिटणीस, मो. ९८२०८६०८०५
mail: atmaram.jadhav@yahoo.co.in
Website: www.banjaratigers.org
आत्माराम सुरसिंग जाधव, राष्ट्रीय अध्यक्ष, राष्ट्रीय बंजारा टायगर्स, मो. ९७३०६२२३११
